सहमतीय सरकार गठन गर्न राष्टपतिद्धारा फेरी ६ दिनको समय थप

जनखबर,

राष्ट्रपति डा. रामवरण यादवले सहमतिको सरकारका लागि तेस्रो पटक म्याद थप्नुभएको छ ।सहमति कायम गरी प्रधानमन्त्रीको चयन र मन्त्रिपरिषद् गठनका लागि फेरि ६ दिनको म्याद थप्नुभएको राष्ट्रपति कार्यालयले जनाएको छ । राष्ट्रपति कार्यालयको तर्फबाट शुक्रबार निकालिएको विज्ञप्तीमा मंसिर २७ गते बुधवारका दिनसम्म राजनीतिक सहमति कायम गरी प्रधानमन्त्रीको चयन र मन्त्रिपरिषद् गठन गर्नका लागि राष्ट्रपति डा. रामवरण यादवले समय थप्नुभएको उल्लेख छ ।यसअघि शुक्रबार बिहान एकीकृत नेकपा माओवादीका अध्यक्ष पुष्पकमल दाहाल प्रचण्डसंगको छलफलपछि राष्ट्रपतिले सहमतिका लागि ६ दिनको समय थप्ने संकेत गर्नुभएको थियो ।राष्ट्रपतिसंगको भेटपछि पत्रकारहरुसंग प्रतिक्रिया दिदै माओवादी अध्यक्ष प्रचण्डले सहमतिको लागि अधिकतम प्रयास भइरहेकोले समय अपुग हुने भन्दै आफुले समय थप्न आग्रह गरेको बताउनुभयो ।  राष्ट्रपतिले अन्तरिम संविधान २०६३ को धारा ३८ को उपधारा १ अनुसार सहमतीय सरकार बनाउन आह्वान गर्दै पहिलो पटक मंसिर ८ गते र दोस्रो पटक १४ गते सात दिनको समय सीमा दिनुभएको थियो ।पटक पटकको समयसीमाभित्र दलहरु छलफलमा बसेपनि अडान छाडेका छैनन् । सत्तारुढ दलहरु प्याकेजमा सहमति गरेमात्रै सरकार छाड्ने अडानमा छन् भने विपक्षीले जसरी पनि सरकार फेर्नुपर्ने अडान राखेका छन् ।