कैलाली, मंसिर 23 - पाहुनाका रुपमा
आफ्नो घरमा बास बस्न आएका प्रधानमन्त्री डा. बाबुराम भट्टराईको सत्कारमा
कैलाली, टीकापुर नगरपालिका विजयनगरका बाबुराम चौधरीको परिवारले
कुनै कसर बाँकी राखेन । शुक्रबार कैलालीको मुक्तकमैया शिविरमा पुगेको
प्रधानमन्त्रीले थारु संस्कृति अनुसार अतिथिलाई अर्पण गरिने मुसाको चटनी,
ढिकरी र अलिकति जाँड समेत चाख्न भ्याउनुभयो ।
‘म मदिरा पिउन्न तर तपाईको सम्मानको लागि एक घुट्को लिन्छु’, सत्कारमा
भातको जाँड देखेपछि प्रधानमन्त्रीले भन्नुभयो । चौधरी परिवारले ‘यो मुसाको
चटनी’ भने पछि प्रधानमन्त्रीले मुस्कुराएर मिठो मानी मानी खानुभएको थियो ।
थारु परम्परा अनुसार पाहुनालाई मुसाको चटनी, जाँडको झोल र ढिकरी लगायतको
परिकार दिने प्रचलन छ । त्यही प्रचलन अनुसार विजयनगरका मुक्तकमैया बाबुराम
चौधरीले प्रधानमन्त्री बाबुराम भट्टराईलाई पनि मुसाको चटनी र जाँडको झोल
चखाउनुभयो ।
थारु परम्परा अनुसार पाहुनाको खुट्टा धोएर ढोग्ने प्रचलन पनि छ । तर प्रधानमन्त्री भट्टराईले त्यसो गर्न भने मान्नुभएन ।
‘काँ यस्तो हुन्छ, यो त सामन्तहरुको परम्परा हो’, प्रधानमन्त्रीले भन्नुभयो, ‘यस्तो त म गर्न दिन्न ।’
प्रधानमन्त्रीको खुट्टा धुन तामाको भाँडो लिएर बसेकी मुक्तकमैया बाबुरामकी
कान्छी श्रीमती सीमा चौधरी प्रधानमन्त्रीले गोडा धुन नमानेपछि हाँस्दै
फर्कनुभयो ।
प्रधानमन्त्रीले मुक्तकमैया बस्तीमा रहेको शक्ति प्राविको परिषरमा सबै मुत्तकमैयाका गुनासा र सुझाव सुन्नुभएको थियो ।
केही दिनअघि ‘प्रधानमन्त्री बाबुरामले प्रस्ताव राखे उहाँसँग मित लगाउने
बारे सोच्ने’ बताएका बाबुराम चौधरीलाई त्यो मौका भने मिलेन । न त्यसबारे
प्रधानमन्त्रीले कुनै प्रशंग उठाउनुभयो, न त बाबुरामले नै ।
No comments:
Post a Comment